YNGRI
FLOKKAR | STYRKTARSJÓÐUR
Knattspyrnufélagið Valur hefur starfræktan styrktarsjóð sem er
ætlað að tryggja að allir núverandi og framtíðar iðkendur Vals geti
staðið straum af þeim kostnaði sem fylgir því að stunda íþróttir í
Val, ásamt því að tryggja að ekkert barn sem vilji stunda íþróttir
verði meinað að gera slíkt sökum fjárskorts á heimili sínu.
Allar umsóknir eru trúnaðarmál sem aðeins stjórn sjóðsins hefur
aðgang að. Þrír skipa stjórn sjóðsins, einn er tilnefndur af
aðalstjórn Vals, annar af stjórn Barna- og unglinasviðs Vals og
þriðji er starfandi framkvæmdastjóri félagsins.
Stjórn styrktarsjóðs Vals er sem hér segir fyrir árið
2023-2024:
- Styrmir Þór Bragason, framkvæmdastjóri Vals
- Louisa Christina, barna- og unglingasvið Vals
- Þorgrímur Þráinsson, tilnefndur af aðalstjórn Vals
Öllum umsóknum skal skilað rafrænt á netfangið styrmir@valur.is
eða í umslagi merktu styrktarsjóður á skrifstofu
Vals.
Úthlutunarreglur sjóðsins
1. grein
Sjóðurinn heitir styrktarsjóður. Sjóðurinn skal að öllu leyti
vinna samkvæmt skipulagsskrá sem aðalstjórn Knattspyrnufélagsins
Vals hefur staðfest.
2. grein
Tilgangur sjóðsins er að styrkja efnaminni iðkendur til þátttöku
í starfi barna- og unglingasviðs Vals. Styrktarsjóður mun, eftir
bestu getu, styrkja iðkendur um æfingagjöld, ferðakostnað vegna
keppnisferða og veita styrki til kaupa á æfingabúnaði, til að mynda
skóm og æfingafatnaði.
3. grein
Stjórn sjóðsins er á hverjum tíma skipuð þremur aðilum. Einn
stjórnarmaður skal árlega tilnefndur af aðalstjórn Vals. Annar
stjórnarmaður skal árlega tilnefndur af barna- og unglingasviði
Vals og sá þriðji skal vera starfandi framkvæmdastjóri Vals, sbr.
ákvæði 5. gr. skipulagsskrár.
4. grein
Við mat á umsóknum skal sjóðsstjórn leggja til grundvallar
umsóknareyðublöð sem skulu fyllt út af kostgæfni. Foreldrar og
forráðamenn iðkenda Vals geta sótt um styrk úr sjóðnum. Flokkar,
hópar eða einstaklingar innan flokka félagsins geta sótt um
ferðastyrki vegna æfinga- eða keppnisferða. Styrkir eru ekki
veittir úr sjóðnum til reglubundinna móta (Íslandsmót, bikarkeppni
og þess háttar). Sjóðsstjórn áskilur sér rétt til að meta umsóknir
í samræmi við 4. gr. skipulagsskrár.
5. grein
Veita skal styrki úr sjóðnum a.m.k. einu sinni á ári.
Sjóðsstjórn getur þó metið það eftir þörfum og áskilur sér rétt til
að veita úr sjóðnum allt að þrisvar sinnum á ári. Umsóknir skulu
berast til framkvæmdastjóra Vals í umslagi merktu styrktarsjóður.
Umsóknir og önnur gögn varðandi umsóknir skulu meðhöndluð sem
trúnaðarmál. Sjóðsstjórn ber að svara öllum umsóknum með formlegum
hætti.
6. grein
Styrkir til einstaklinga vegna sérstakra aðstæðna geta tekið
yfir æfingagjöld og annan kostnað við þátttöku í íþróttinni.
Styrkir vegna ferðakostnaðar miðast við almennan kostnað (flugmiða,
rútuferðir og gistingu), við þátttöku í móti eða annan kostnað sem
til fellur vegna æfinga- eða keppnisferðar. Styrkir vegna starfsemi
yngri flokka eru ekki veittir til launakostnaðar.
7. grein
Styrkir verða greiddir út í síðasta lagi tveimur vikum eftir
úthlutun.
8. grein
Úthlutunarreglur þessar skal endurskoða árlega og vera
samþykktar af aðalstjórn Knattspyrnufélagsins Vals.
