Birta frétt

Alexander Petersson hefur skrifað undir eins árs samning við Val en hann lék síðast með MT Melsungen í Þýskalandi áður en hann tók sér svo árs frí frá handbolta.

Alexander, sem varð á dögunum 43 ára, þarf vart að kynna en hann er löngu orðinn einn dáðasti íþróttamaður þjóðarinnar.

Alexander langar að ljúka ferlinum á Íslandi og er það heiður fyrir okkur Valsmenn að hann hafi valið félagið okkar sem sinn síðasta áfangastað á glæsilegum ferli. Hann á að baki 186 landsleiki og var t.a.m. kjörinn íþróttamaður ársins árið 2010 og var lykilmaður í íslenska landsliðinu sem vann bæði silfur á Ólympíuleikunum í Peking 2008 og bronsverðlaun á EM í Austurríki 2010.

Síðast þegar Alexander spilaði hérlendis var hann valinn besti sóknarmaður Íslandsmótsins árið 2003 þar sem hann spilaði með Gróttu/KR.

Alexender er ekki ókunnugur Hlíðarenda en kona hans Eivor Pála Blöndal lék með Val á sínum tíma og á einnig að baki 13 landsleiki fyrir Íslands hönd. Það þarf ekki að fara mörgum orðum um það hversu mikill hvalreki það er fyrir Val að fá Alexander og hans fjölskyldu að Hlíðarenda og bíðum við spennt eftir að fá þau heim en þau hafa verið með annan fótinn í Hlíðunum síðustu ár.

Áfram hærra!