Birta frétt

Dóra María Lárusdóttir, Mist Edvardsdóttir, Elín Metta Jensen og Laufey Björnsdóttir hafa allar skrifað undir tveggja ára samninga við knattspyrnudeild Vals.
Allar eru þær lykilleikmenn í meistaraflokki kvenna og því eru þetta frábærar fréttir fyrir kvennaknattspyrnuna í Val.
Dóru Maríu Lárusdóttur þarf vart að kynna fyrir Völsurum. Dóra er 31 árs, hefur spilað 247 leiki í mfl. og 111 mörk.
Fyrsti meistaraflokks leikurinn árið 2001. A- Landsleikirnir eru orðnir 113 talsins og 18 mörk í þeim. Dóra er einfaldlega Valsari út í eitt
og er jafnframt gríðarlega góð knattspyrnukona. Hennar reynsla mun vega þungt á komandi tímabilum.

Mist Edvardsdóttir er 26 ára og hefur spilað 109 leiki fyrir Val og skorað í þeim 11 mörk. Mist á jafnframt 13 A-landsleiki að baki og 1 mark í þeim.
Valsarar þekkja sögu Mistar, hún er baráttujaxl, mikill Valsari og er afskaplega traustur leikmaður.

Elín Metta Jensen er 21 árs markaskorari af guðs náð. 64 mörk í 98 meistaraflokksleikjum segja allt um þessa uppöldu Vals markakonu.
Elín Metta er frábær knattspyrnukona og á einfaldlega heima í rauðri Valstreyju. Elín Metta hefur spilað 21 A-landsleik og skorað 4 mörk í þeim.

Laufey Björnsdóttir er 27 ára miðjumaður sem sannaði mikilvægi sitt með Valsliðinu á síðustu leiktíð þegar hún var lykilmaður á miðju liðsins.
Laufey á 77 leiki að baki fyrir Val og í þeim hefur hún skorað 5 mörk. Laufey hefur spilað með U-15 og 17 landsliðum Íslands.

Það er sannarlega gleðilefni að þessar frábæru knattspyrnukonur hafi ákveðið að vera áfram í Val.